ازاي تغير الوظيفة في البطاقة الي مصمم جرافيك

تغير الوظيفة في البطاقة الشخصية الي مصمم جرافيك

المطلوب : ( عدد 2 صورة شخصية - عدد 2 صورة لهوية تحقيق الشخصية  - 80 جنية مصري )

أول حاجة هتروح علي مكتب القوي العاملة ( مكتب العمل ) التابع للمدينة الي أنت ساكن فيها

هتخش للموظف تطلب منة شهادة مزاولة مهنة هيديك ورقة فيها اسماء الطوابع الي هتروح تشتريها من مكتب البريد

هتروح بالورقة لآي مكتب بريد قريب من مكتب العمل تشتري الطوابع وهي سعرها حوالي 80ج

بعدين هترجع لمكتب العمل بالطوابع الي أشتريتها هياخد الطوابع الاصل والصور الشخصية وصور البطاقة

وهيديك ورقة ويقولك هتيجي بعد يومين او ثلاثة علشان تروح للمهندس تختبر ( غالبا بتروح لآي مطبعة بيتعامل معاها المكتب ) 

والآختبار سهل وبسيط جدا وفي بعض المكاتب بتعمل أستثناء في موضوع الآختبار دة يعني بالبلدي مش بتروح المطبعة ولا بتختبر

- في حالة أنك هتروح تختبر هيديك ورقة تروح بيها المطبعة تختبر هناك وترجع تاني لهم

- في حالة أن لو المكتب بيخلص هو موضوع الآختبار دة هتروح تلاقي الشهادة بتاعتك جاهزة

كدة أستلمنا الشهادة وفي ناقصة أية هي ؟ ( ترخيص مزولة حرفة ) 

طيب هتعمل اية ؟ هتروح علي مديرية القوي العاملة والهجرة وتسأل علي مكتب أصدار التراخيص 

هتخش المكتب دة بالشهادة هياخد منك صورة شخصية علشان يحطها في الترخيص وهتاخد الرخصة ومش هتدفع أي فلوس تاني

كدة أنت معاك ( الشهادة - ترخيص مزولة حرفة )

طيب أية الخطوة القادمة ؟ ( هتروح علي مركز المعلومات ) علشان نشتري أستمارة بطاقة

تقدر تشتري أستمارة عادية ب 15 جنية وهتاخد البطاقة في خلال أسبوعين

وتقدر تشتري استمارة سريعة ب 75 جنية وهتاخد البطاقة في خلال 3 أيام

بعد ما تشتري الاستمارة تقدر تروح البيت علشان تملي الاستمارة براحتك والبيانات تكون تمام وعلشان تجيب وصل مياة أو كهرباء يثبت أن العنوان الي في البطاقة هو عنوانك بعدين تاني يوم هتروح معاك الآتي :-

( أستمارة البطاقة - شهادة مزاولة المهنة - وصل مياة ( كهرباء ) - رخصة مزاولة الحرفة ) 

خلي معاك من كل حاجة صورة + الأصل ومتنساش في بيانات البطاقة تكتب الوظيفة مصمم جرافيك وسيب جهة العمل فاضية

الموظف لما يشوف الوظيفة مصمم جرافيك هيطلب منك الشهادة الأصل لو عديت المرحلة دي من غير مشاكل تأكد ان البطاقة هتطلع 100% مصمم جرافيك طيب لو الموظف طلب حاجة تثبت التأمين عليك ؟ هتروح علي أي مطبعة او مكتب تعرفة تخلية يدخلك في التأمينات عندة وهتحاسبة حسب ما يطلب وبعدين ترجع بنفس الورق لمركز المعلومات تاني ومش هيبقا في اي مشاكل

انا شخصيا طلعتها من غير ما يطلب مني تأمينات ولا غير فقط طلب الشهادة الأصل 


لو عندك أي استفسار ممكن تسيب تعليق علي المدونة وهرد عليك في خلال دقائق